Song 7 | MEU | STEP | Lohia kekenimu e, emu mai tamakadia ida be daka hairai! Mamumu bauka-baukadia na herahera nadidia na heheto, karakara tauna namona ese e kara.

Song of Solomon 7

1 Lohia kekenimu e,
emu mai tamakadia ida be daka hairai!
Mamumu bauka-baukadia na herahera nadidia na heheto,
karakara tauna namona ese e kara.
2 Hudomu na kehere kuboruna na heto,
vine ranuna ai e honu hanaihanaimu.
Bogamu na uit isenuna ta,
sosana ^{▼▼“Sosana” na Heberu taudia edia herahera avana ta.} ese e haheḡeḡea daemu.
3 Ratamu ruaosi na uda nanidia natudia rua na heheto,
uda nanina natuna vara-hekapa.
4 Aiomu na kohoro na heto,
aivori ^{▼▼“Aivori” na elefant doana.} amo e hadaia ḡauna.
Matamu na Hesebon gohugohudia,
Batarabim ikoukouna badibadinai.
Udu-baubaumu na Lebanon kohorona na heto,
Damasko roha-hekeina.
5 Kwaramu na mai hairaina, Karamele ororona na heto;
bona huimu heveriveridia na varo kakakakadia na heheto,
hanua pavapavana na huimu ai vada e heau kau.
*****

6 Lalokau e, moale ihavarana kekenimu,
oi na hane namo, oi na mai hairaimu.
7 Emu lata na buatau auna na heto,
bona ratamu na buatau takodia na heheto.
8 Lau na tomu, Buatau auna baina dae,
bona takona baina abidia.
Ratamu na vine takodia ida bae heḡereḡere,
udumu bonana na apolo bonadia heḡereḡeredia.
9 Emu haherahu na vine ranuna namo-hereana na heto,
i'inuna na mai gaihona,
bibinagu ai bona isegu ai.
*****

10 Lau na egu lalokau tauna ena;
ia ese e ura henigumu.

11 Egu lalokau e, aoma!
aita raka lasi tano paka ai,
hanua maraḡidia ai baita noho;
12 daba ai vine imeadia baitala,
baita itaia, vine vada e kobo dae eiava,
baita diba, buredia vada e papa eiava,
baita tahua, rimono ^{▼▼“Rimono” na Heheru taudia edia au huahua ta.} vada e tubu eiava lasi.
Unuseni ai baina ura henimu.

13 Dudai ^{▼▼“Dudai” na Heheru taudia edia muramura avana ta.} bonadia na e daemu,
emai iduara daediai na huahua namo-hereadia idau-idau,
matamatadia bona gunadia,
vada na haboudia oiemu,
egu lalokau e!